Orin : patigo pe «toull ar c’hazh », an anv-se a ra dave d’an toull a vez kavet e traoñ an dorioù evit aesaat monedone ar c’hizhier diouzh an noz.

Doare ar c’hoari : anv zo eus ur c’hoari war wenn ma tle pep c’hoarier lakaat e voul da ruilhal a-raok he lakaat da dremen dre doull ur plankenn staget ouzh al leur. Evit-se ez aio pelloc’h-pellañ diouzh a ar gwenn. 10 bannadenn a vo gant pep hini.

Tachenn : An dachenn (disglavenn,porzh skol,leton...), plat dre vras,a zle lezel ar voul da ruilhal mat. Adal 1 metrad diouzh ar plankenn e vez treset linennoù emlec’hiañ bep metrad war al leur.

Dafar : ret eo kaout ur voul hag ur plankenn, toullet ennañ un hantergelc’h brazikoc’h e dreuzkiz eget hini ar voul. Lakaet eo war al leur ha dalc’het gant pevar fikerom pe pezhioù all.

Obererezh pennañ : bannañ resis, ouesk ha gant nerzh zoken.

Kregiñ ar c’hoari : Mont a ra an hini zo bet tennet ar blouzennig gantañ er par.

MONT EN-DRO AR C’HOARI : Teuler a ra pep c’hoarier e voul gentañ adal ur metr diouzh ar plankenn. Evit ma vefe talvoudus ar vannadenn ez eo ret d’ar voul mont penn-da-benn a-dreuz an toull. 5 pe 10 bannadenn zo gant pep c’hoarier. Hemañ a gil betek ar merk da heul, bep tro m’eo deuet a-benn da lakaat e voul da dreuziñ an toull. A-hend-all e vann e voul betek ober berzh pe betek e zekvet bannadenn.

ECHUIÑ A RA AR C’HOARI : p’eo bet bannet e voul dek gwezh gant pep hini.Gounezet en deus an hini kentañ zo deuet a-benn da vannañ ar pellañ pe an hini zo bet merket ar muiañ a boentoù gantañ.

EVEZHIADENNOÙ PEDAGOGEL :
Aozañ an hed etre al linennoù-bannañ a c’hell bezañ graet, hervez oad ar vugale evit o luskañ gwelloc’h (ar c’hoari evit an oadourien vo loc’het da 3 m diouzh ar plankenn evit mont betek 10 m).