Orin : C’hoari hengounel eus Gwalarn Kreiz Breizh. C’hoariet e vez hiziv an deiz e diabarzh an tric’horn Gourin-Karaez-Rostrenenn.

Doare ar c’hoari : c’hoari war wenn ma vez enebet daou c’hoarier pe daou skipailh.Tro-ha-tro e c’hoari ar c’hoarierien; ganto ez eus daou baled a vez bannet an eil war-lerc’h egile. Klasket e vez tostaat diouzh ar gwellañ eus ar pinoe zo gwenn e liv pe zo bet lakaet war un tamm paper gwenn (ar mestrig).

Tachenn : daou bern douar, glebiet diwar-c’horre a-benn resev ar pinoe hag ar paledoù all.

Dafar :
-2 baled e-tro 140 g o fouez,5.5 cm o zreuzkiz, 0.8 cm o zevder.
-2 vern douar gleb pe, a zo gwelloc’h, 2 vern pri un tammig war-draoñ (evit gwelet ar c’hoari) ; gant 2 vern douar ne vez ket kollet amzer da vont ha dont.Dre ma’z int gleb e c ’hell ar paledoù chom el lec’h ma’z int kouezhet.

Obererezh pennañ : bannañ ouesk ha resis war wenn.

KREGIÑ A RA AR C’HOARI : tennet d ’ar sord e vez ar c’hoarier a grog ganti.

MONT EN-DRO AR C’HOARI : bannet e vez e daou baled lerc’h-ouzh-lerc’h gant pep c’hoarier pe gant un ezel eus pep skipailh. Da c’houde ez eo tro un ezel all eus ar skipailh koll (da c ’houzout eo an hini n ’en deus ket lakaet e baled pe e baledoù an tostañ d’ar pinoe),hag all.

ECHUIÑ A RA AR C’HOARI : echu eo ar c’hoari pa’z eo bet bannet e zaou baled gant ar c’hoarier diwezhañ.Gounezet eo gant ar c’hoarier pe ar skipailh en deus lakaet an niver brasañ a baledoù an tostañ d’ar pinoe.

EVEZHIADENNOÙ PEDAGOGEL : ret eo lakaat an hed bannañ da glotañ gant oad ar vugale.17 m eo an hed etre an daou vern douarn evit an oadourien. Evit ma vefe aesoc’h da brientiñ hag evit ma koustfe marc’hadmatoc’h ar c’hoari ez aliomp ac’hanoc’h da implijout paledoù evit c’hoari war blankenn a vez kavet aes a-walc’h da brenañ.